اسمحوا لي إني أقول لكم وأقول لقداسة البابا ولكل الأشقاء والأهل كل عام وأنتم بخير. وأيضًا أهنئكم على الافتتاح الجزئي للكاتدرائية. وهذا الافتتاح رسالة كبيرة.. رسالة من مصر ليس فقط للمصريين بل للعالم كله. رسالة سلام ورسالة محبة.. نحن بفضل الله سبحانه وتعالى نقدم نموذج للمحبة والسلام بيننا وبين بعض.. ستخرج المحبة وسيخرج السلام من مصر وسيعم العالم كله.. يمكن وسط هذه الأحداث تقولوا: معقول هيبقى كده؟!
عمر الشر وعمر الخراب وعمر التدمير وعمر القتل يقدر أبدًا يهزم الخير والبناء والمحبة والسلام، لا يمكن! يمكن تقولوا: إزاي ده هيحصل؟ لكن هيحصل. وباقول للناس كلها: يا ترى الفرحة دي اللى احنا شايفينها تساوى كام؟! تساوى ايه؟! واحنا مش شايفين الخير ده اللى انتوا شايفينه ده بفضل ربنا سبحانه وتعالى.
خذوا بالكوا احنا واحد ومحدش أبدًا هيقدر يقسمنا.. دى برضو رساله ثانية فى زحمة الألم ده.. وأنا ماكنتش عاوز أتكلم في أي آلام لأن الألم بيؤذينا كلنا.
انا مش عاوز اطول علشان تبدأوا صلواتكم. يا رب يقدّرنا إننا ندخّل الفرحة على كل الناس..
أنا أشكركم على حفاوة الاستقبال.. تحيا مصر بالمصريين.. محدش أبدًا هيقدر على مصر، وأوعوا تنسوا اللي عاوز يؤذينا يفرق بيننا ويخلينا نأكل بعضنا البعض.
كل سنة وأنتم طيبين وعام سعيد عليكم وعلينا وعلى الدنيا كلها.. كل سنه وأنت طيب يا قداسة البابا..
كل سنه وأنتم طيبين.
