العين غمضت .. واللسان سكت .. والودان كمان بطلت سمعان
التعب راح والمرض زاح .. وخلعت جسد منهك تعبان
ولبست جسد نوراني أبيض .. وزي الملايكة .. طرت بيه فرحان
ووقفت بين صفوفهم متهني .. تغني معاهم تسبحة وألحان
ويا الأربعة وعشرين قسيس .. ف أبهى صورة وف أبهي مكان
والسما فتحت .. والرؤيا وضحت .. وابتديت تشوفه !!! رؤيا العيان
ياتري إيه اللي انت شايفه .. وماكونتش عارف توصفه زمـان ؟
حلوة السما ياسيدنا ؟
من فضلك اذكرنا احنا كمان
تلقاك شايف العذرا بتضوي .. والانبا أنطونيوس أب الرهبان
وبتحكي ويا بولس عن انتشار الكرازة ف كل مكان
وقاعد ويا أثناسيوس وساويروس وديوسقوروس حامي الايمان
وبتحكي عن تعاليمك ودروسك مع يوحنا ذهبي اللسان
وبتفرح ويا الأنبا أبرام .. باللي عملته ويا الفقير والغلبان
وبتنشد ويا داوود أشعارك .. يعزفها هو بأ حلى ألحان
ياتري إيه اللي شايفه كمان .. وماكونتش عاوز تقوله زمان ؟
حلوة السما ياسيدنا ؟
من فضلك اذكرنا احنا كمان
